كتير من الشباب اتجه لعمل ريجيم لان كتير مننا شايفين نفسهم بوزن غير صحى عشان كده حبيت اشارككم نظام رجيم عن تجربة.
فى البداية لازم تعرفوا ان الموضوع سهل ممتنع .. بس انت اللى هختار يبقى صعب او سهل .. و لازم تعرفوا ان الموضوع متوقف على العزيمة و الارادة ! تحدى نفسك .. هتقدر بإذن الله . 
بنستخدم فى النظام بتاعنا اكلات دايت و رياضة ان شاء الله
و ان شاء الله فى اول اسبوع هتنقص 5 كيلو .. تانى و ثالث و رابع اسبوع من 3 : 5 كيلو .. و حضرتك اللى تحدد انت عاوز توصل لكام كيلو .. هنستمر فى الريجيم ده لحد ما توصل للوزن اللى يناسبك .
الطعام عبارة عن :
الفطار : بيضة مسلوقة او قطعة جبنة قريش + نصف رغيف .
الغذاء : ربع فرخة مشوية بدون طبقة جلد او دهون + نصف رغيف .. او 4 قطع صغيرة او شرائح لحمة مشوية + نصف رغيف .. او سمكة مشوية + سلطة + نصف رغيف
العشاء : زبادى بدون وش .. او فاكهة .
عند الشعور بالجوع تناول الفاكهة
بالاستمرار على النظام الغذائى ده + رياضة المشى .. و اقصد هنا بالمشى : خطوات سريعة يوميًا لمدة تتراوح من نصف ساعة : ساعة .. بالنسبة للخضار انا الحقيقة مبحبش الخضار فكنت باخد فيتامينات تعوضنى عنها .. الخضار مطلوب فى وجبة الغذاء و لكن ابتعدوا عن المسبكات .. انا بعد ما مشيت ع النظام ده نزلت 25 كيلو فى خلال شهر و نصف !
ازاى هنحافظ على وزننا ؟
بعد لما نوصل للوزن اللى شايفينه مناسب .. هنبدأ نزود فى كميات الاكل تدريجيًا + ممارسةرياضة المشى .
اخيرًا أنصحكم بالابتعاد تماما عن المسبكات و الزيوت و المحافظة على رياضة المشى يوميا .
لو عندك اى استفسار اتفضل و ان شاء الله اجاوب حضرتك .